Carl Sagan

Carl Edward Sagan (9 de payares de 1934, Brooklyn – 20 d'avientu de 1996, Seattle) foi un astrónomu, astrofísicu, cosmólogu, escritor y divulgador científicu d'Estaos Xuníos. Sagan publicó numberosos artículos científicos y comunicaciones y foi autor, coautor o editor de más d'una ventena de llibros. Defensor del pensamientu escépticu científicu y del métodu científicu, foi tamién pioneru de la exobioloxía, promotor de la busca d'intelixencia estraterrestre al traviés del Proyeutu SETI ya impulsó la unviada de mensaxes a bordu de sondes espaciales, destinaos a informar a posibles civilizaciones estraterrestres alrodiu de la cultura humana. Por aciu les sos observaciones de l'atmósfera de Venus, foi de los primeros científicos n'estudiar l'efeutu ivernaderu a escala planetaria. Na Universidá Cornell, Carl Sagan foi'l primer científicu n'ocupar la Cátedra David Duncan d'Astronomía y Ciencies del Espaciu, creada en 1976, y foi direutor del Llaboratoriu d'Estudios Planetarios. Carl Sagan foi bien popular polos sos llibros de divulgación científica —en 1978, ganó'l Premiu Pulitzer de Lliteratura Xeneral de Non Ficción pol so llibru Los Dragones del Edén—, pola gallardoniada serie documental de TV Cosmos: A Personal Voyage, producida en 1980, de la que foi narrador y coautor, y pol llibru Cosmos que foi publicáu como complementu de la serie, amás de pola novela Contautu, na que se basa la película homónima de 1997. A lo llargo de la so vida, Sagan recibió numberosos premios y condecoraciones pol so llabor como comunicador de la ciencia y la cultura. Ta consideráu como unu de los divulgadores de la ciencia más carismáticos ya influyentes, gracies a la so capacidá de tresmitir les idees científiques y los aspeutos culturales al públicu ensin especializar con cencellez non exenta de rigor, lo que dio orixe a ensame de vocaciones científiques ente'l públicu xeneral.